Nisehoana tranga fangalarana tariby mitondra herinaratra mirefy 300 m indray tao Marovoalavo, Fokontany Mangatany, Distrikan’ Arivonimamo, ny alin’ny 21 Septambra 2026, tokony ho tamin’ny 11 ora sy sasany.

Vao naharay antso momba ny fahatapahan’ny herinaratra tao amin’ny Kaominina Ambanivohitra Ampahimanga ny JIRAMA, dia niara-nihetsika avy hatrany tamin’ny Zandary, sy ny fokonolona tao Alakamisikely, ireo mpiasan’ny orinasa any an-toerana.

Nanao fitsirihana teny an-toerana sy fanarahan-dia an’ireo mpanao ratsy, izay mbola eo an-dalam-pikarohana ankehitriny.

Ankilany dia milofo amin’ny fanoloana ny tariby very ireo teknisianina an’ny JIRAMA, mba hamerenana haingana ny famatsiana herinaratra mankany amin’ny Kaominina Ambanivohitra Ampahimanga sy Amboanana.

Iangaviana hatrany ny mponina ao amin’ny Faritra Itasy, hanamafisana ny fiaraha-mientan’ny rehetra : iarovana ny fananana iombonana sy hamongorana ny halatra tariby mitondra herinaratra izay mahazo vahana tato ho ato, any amin’iny Faritra iny.