Notanterahin’ny FFKM Vakinankaratra, ny Alatsinainy 07 sy Talata 08 Septambra 2026, ny fanofanana ireo mpampiofana ho mpanamora sy mpanelanelana, ho fanomanana ny fanatanterahana ny Fikaonandoham-pirenena eny ifotony.

 

Nandritra ny fotoam-panokafana dia nandray anjara tamin’ny fanentanana ireo mpiofana ny Talem-paritra Misahana ny Fanavaozana Vakinankaratra, Ramatoa Tantely RAJAONARIVONY.

 

Nohamafisiny ny maha-zava-dehibe ny fandraisana andraikitra am-pahatsorana, am-panetren-tena ary ho tombontsoan’ny firenena sy ny taranaka fara-mandimby. Nanazava ihany koa izy ny fizotry ny Fikaonandoham-pirenena ary nanome fanampiana ara-pitaovana hoenti-manatanteraka ny fiofanana.

 

Nandritra ny roa andro dia nampitaina ireo paikady sy teknika enti-manatanteraka ny dinika eny ifotony, ary nohazavaina ireo lohahevitra 12 iorenan’ny Fikaonandoham-pirenena, ka lohahevitra 10 no hifantohana eto Vakinankaratra ary 2 no natokana ho an’ny sehatra nasionaly.

 

Ny Talata 08 Septambra kosa dia nifantohana tamin’ny fandrafetana ny tetibola sy ny drafitra fanatanterahana ny dinika ao Vakinankaratra.

 

Nahatratra 104 ireo mpiofana nandray anjara tamin’ity fiofanana ity, izay vonona hiantsoroka ny andraikiny amin’ny fanatanterahana ny dinika eny ifotony.