FANOMPOAM-PIVAVAHANA : « FANAVAOZANA, HITONDRA FAHAFAHANA, HITONDRA OLOM-BAOVAO HO AN'I MADAGASIKARA »

🔴 FANOMPOAM-PIVAVAHANA | ANTSOHIHY

📅 13 Oktobra 2026
📍 Paroasy Saint Paul – Antsohihy, Faritra Sofia

Nisokatra tamin’ny fomba ofisialy teto Antsohihy ny fankalazana ny « Fetin’ny Fahafahana« .

Ity hetsika ity dia entina hanamarihana ny faha-1 taon’ny dingana vaovao teo amin’ny fiainam-pirenena ao anatin’ny Fanavaozana.

Ny fanompoam-pivavahana iraisam-pinoana teo anivon’ny Paroasy Saint Paul no nanombohan’ny fandaharam-potoana rehetra, nitondrana am-bavaka ny firenena sy ny hoavin’ny vahoaka malagasy. 

Nandritra ny toriteny dia nampitaina tamin’ny fomba mafonja ny hafatra hoe: “Tsy nofinofy ny tena Fanavaozana, fa antso iombonana ho an’ny rehetra mba hiara-hientana sy hiara-hisalahy amin’ny fanatrarana izany.” Nifantoka manontolo tamin’ny finoana, ny firaisankina ary ny andraikitra iombonana ho an’i Madagasikara ny fotoana.
 

Ireo olom-panjakana nanome voninahitra ny fotoana:

Tonga niara-niombom-bavaka teto Antsohihy ny Filohan’ny Fanavaozana ny Repoblika, ny Kolonely Randrianirina Michaël, niaraka tamin’ireo Mpanolotsaina Avo, ny Jeneraly Rabearimanana Lucien sy ny Kolonely Rampanarivo Thierry.

Nanotrona izany koa ny Filohan’ny Antenimierampirenena, ireo mpikambana maromaro eo anivon’ny Governemanta, anisan’izany ny Minisitra Misahana ny Fanavaozana, Me Hanitra Razafimanantsoa, ary ireo olom-panjakana ambony sivily sy miaramila ao amin’ny Faritra Sofia. 

Ny tohiny amin’ny fandaharam-potoana :

Tafiditra ao anatin’ity fankalazana ny Fahafahana ity ny fitokanana fotodrafitrasa samihafa (efitranon-tsekoly sy Mozea), ny fitsidihana ny trano fonenan’ny Filoha Philibert Tsiranana, ary hofaranana amin’ny matso lehibe hotanterahina eo amin’ny seranam-piaramanidin’Antsohihy ny alarobia 14 Oktobra izao.