𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-05 𝒐𝒌𝒕𝒐𝒃𝒓𝒂 2026]

Ny Praiminisitra, Lehiben’ny Governemanta, RAJAONARISON Mamitiana, no nanokatra tamin’ny fomba ofisialy androany, tetsy Anosisoa Ambohimanarina Antananarivo, ny fanentanana sy fanaovam-baksiny hiadiana amin’ny lefakozatra sy ny kitrotro, miaraka amin’ny fizarana Vitamine A ho an’ny ankizy.

Nandritra ny lanonana dia samy nanasongadina ny maha-zava-dehibe ny fanaovam-baksiny, ny fisorohana ny aretina ary ny fiarovana ny fahasalaman’ny zaza ireo tompon’andraikim-panjakana sy ireo mpiara-miombon’antoka, anisan’izany ny UNICEF, ny OMS ary ny Firenena Amerikana.

Nohamafisin’ny Praiminisitra fa manana andraikitra lehibe amin’ny fiarovana ny ain’ny Malagasy ny mpiasan’ny fahasalamana. Nambarany fa « miaramila miaro ny Malagasy ihany koa ny mpiasan’ny fahasalamana », noho ny asa ataon’izy ireo eny ifotony amin’ny fisorohana ny aretina, ny fanaovam-baksiny ary ny fandraisana an-tanana ny fahasalaman’ny mponina.

Naneho fankasitrahana ireo mpiara-miombon’antoka manohana hatrany ny sehatry ny fahasalamana ihany koa ny Praiminisitra. Nambarany fa hampitomboina ny ezaka sy ny loharanom-bola atokana ho an’ny fahasalamam-bahoaka, ho fanamafisana ny fisorohana sy ho fanatsarana hatrany ny tolotra ara-pahasalamana ho an’ny vahoaka.

Ny hetsika tahaka izao dia maneho asa mivaingana sy akaiky ny vahoaka, izay miaro mivantana ny fahasalamana sy ny tombontsoan’ny Malagasy.

Tao anatin’ity fotoana ity ihany koa no nanaovana ny fanolorana fiara fitondrana marary, ho fanamafisana ny fitaovana enti-miasa sy ny fahafaha-mandray an-tanana ireo marary eny anivon’ny tobim-pahasalamana.

Nisy ihany koa ny fanolorana amboara sy mari-pankasitrahana ho an’ireo Fokontany mendrika indrindra amin’ny fanaovam-baksiny, ireo CSB naneho fahavitrihana sy nahavita ezaka, ary ireo renim-pianakaviana mendrika, ho fankasitrahana ny fandraisan’izy ireo anjara amin’ny fiarovana ny fahasalaman’ny ankizy.

Ity fanentanana ity dia mifantoka amin’ny fanaovam-baksiny hiadiana amin’ny lefakozatra sy ny kitrotro, miaraka amin’ny fizarana Vitamine A, ho fanamafisana ny fisorohana ny aretina sy ny fiarovana ny fahasalaman’ny ankizy Malagasy.

Fiarovana ny zaza, fiarovana ny hoavin’ny Firenena.

𝗡𝘆 𝗦𝗲𝗿𝗮𝘀𝗲𝗿𝗮