Notanterahina ny Talata 29 Septambra 2026, tao amin’ny efitranon’ny Faritra Atsimo Andrefana, Toliara, ny lanonana fametrahana an’Atoa Juvelin Rezara ho Talem-paritra misahana ny Fanavaozana ao Atsimo Andrefana.

 

 Nanomboka tamin’ny fotoam-pivavahana fohy notarihin’ireo Raiamandreny FFKM ao Toliara ny lanonana.

 

 Tonga nanatrika sy nanome voninahitra ny fotoana ireo tompon’andraikim-panjakana eo anivon’ny Faritra, ny Lehiben’ny Faritra, ny Lefitrin’ny Lehiben’ny Distrika Toliara I sy II,ny lefitry ny filohan’ny Delegasiona manokan’ny Kaominina Toliara I, , ny Ben’ny Tanana Kaominina Mitsinjo Toliara II, ireo tompon’andraikitra sivily sy miaramila, ireo Raiamandreny ary ireo fikambanan’ny tanora.

 

 Nisolo tena ny Minisiteran’ny Fanavaozana foibe kosa ny Tale Jeneraly misahana ny Fandrindrana araka’asa sy ara-stratejika Atoa Rakotoson Laurent , ireo Tale ary ireo mpikambana ao amin’ny Kabinetran’ny Minisiteran’ny Fanavaozana.

 

 Nanome tso-drano ny Talem-paritra vaovao ny solontenan’ireo Raiamandreny eo anivon’ny Faritra..

Nandritra ny lahateniny, nanambara ny Tale Jeneraly Rakotoson Laurent fa mahakasika ny olona sy ny fomba fiasa ny Fanavaozana. Araka ny fanazavany, ny fametrahana ireo fototra ilaina amin’ny Fanavaozana no anisan’ny asa ataon’ny Fitondram-panjakana amin’izao fotoana izao.

 

 Nohamafisiny ihany koa fa mpanompon’ny vahoaka ny mpitondra, ka tokony hifototra amin’ny fanompoana ny vahoaka ny fanatanterahana ny andraikitra. Notsiahiviny ihany koa ireo iraka enina (6) iantsorohan’ny Minisiteran’ny Fanavaozana.

 

 Nisaotra ny Fitondram-panjakana noho ny fahatokisana sy ny fanendrena azy ny Talem-paritra vaovao. Nanentana ny hery velona rehetra eto amin’ny Faritra Atsimo Andrefana ihany koa izy mba hifanome tanana amin’ny fanatanterahana ny Fikaonandoham-pirenena miaraka amin’ny FFKM.