Notanterahina tao Sambava ny 28 Septambra 2026 ny lanonana fametrahana amin’ny fomba ofisialy an’Atoa Randrianasolo Eliahevitra, ho Talem-paritra misahana ny Fanavaozana ao SAVA.

 

Nanome voninahitra ny lanonana ireo tompon’andraiki-panjakana sy solontena isan-tsokajiny ao an-toerana, anisan’izany ny Lehiben’ny Faritra, ny Lehiben’ny Fileovana ary ny Ben’ny Tanàna Lefitra ao Sambava. Naneho ny fahavononany hiara-hiasa amin’ny Talem-paritra vaovao izy ireo amin’ny fanatanterahana ireo asa mifandraika amin’ny Fanavaozana.

 

Nisolo tena ny Minisitra misahana ny Fanavaozana ny Tale Jeneraly misahana ny Fikaonandoha, Atoa Rahajary Tsialoninarivo.

Nambarany nandritra ny lahateniny fa tsy vitan’olona na vondrona iray irery ny Fanavaozana, fa mitaky fiaraha-mientan’ny Fanjakana, ny mpandraharaha ary ny vahoaka.

 

Notsindriany ihany koa ny andraikitry ny Minisitera amin’ny fanomezana tantsoroka amin’ny fanatanterahana ny Fikaonandoham-pirenena, izay tarihin’ny FFKM, ary koa ireo asa maro hafa iantsorohan’ny MCR.

 

Anisan’izany ny fananganana ny Plateforme des Auditeurs Ministériels (PAM), izay natao hanombanana ireo fanatsarana ilain’ny Fanavaozana sy hanaraha-maso ny fanatanterahana izany. Eo ihany koa ny Cellules de Refondation Ministérielles (CRM), izay hanohana sy hitarika ny fanatanterahana ireo lahasa voafaritra ho fanatsarana ny asan’ireo Minisitera.

 

Noderaina manokana ihany koa i Sambava sy ny Faritra SAVA noho ny fahadiovan’ny tanàna sy ny fahadiovam-po hita taratra amin’ny fifandraisana amin’ny mponina.

Nandritra ny fitsidihana ireo distrika dia voaray ihany koa hoy izy ireo olana iombonan’ny mponina, ka anisan’izany ny fihenan’ny vidin’ny lavanila, ny ady tany, ny fanimbana ny tontolo iainana ary ny tsy fahampian’ny fizaram-baovao.

 

Nampaherezina ihany koa ny vahoakan’i SAVA mba ho sahy hijoro amin’izay tokony hovaina sy havaozina. Ny Fanavaozana dia miainga amin’ny tsirairay, mitaky fahatsapantena sy fahasahiana.

 

“Tsy osa isika. Tsy mahantra isika. Tompony isika fa tsy mpindrana ity firenena ity.”

 

Ho an’ny Talem-paritra vaovao, Atoa Randrianasolo Eliahevitra, dia naneho fankasitrahana noho ny fitokisana napetraka taminy ary nanambara ny fahavononany hanatanteraka amim-pahamatorana ny andraikitra nankinina aminy, ho fanohanana ny ezaka fanatanterahana ny Fanavaozana ao amin’ny Faritra SAVA