𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-24 𝒔𝒆𝒑𝒕𝒂𝒎𝒃𝒓𝒂 2026]

Noraisin’ny Praiminisitra, Lehiben’ny Governemanta, RAJAONARISON Mamitiana, ny Solontena Maharitry ny PNUD eto Madagasikara, izay nanolotra sy nampahafantatra ny tatitra momba ireo filàna ho amin’ny fanarenana ny fahasimbana nateraky ny fandalovan’ny rivo-doza Fytia sy Gezani.

Ity tatitra na Post-Disaster Needs Assessment (PDNA) ity dia vokatry ny fanadihadiana lalina natao niaraka tamin’ireo rafitra nasionaly, indrindra ny CPGU sy ny BNGRC. Ny PNUD, ny Banky Iraisam-pirenena (World Bank) ary ny Vondrona Eoropeana (UE) no mpiara-miombon’antoka nanome tantsoroka ara-teknika sy ara-bola tamin’ny fanatanterahana ity fanombanana ity.

Nanolotra mivantana tamin’ny Praiminisitra ny tatitra, tamin’ny endrika an-taratasy sy elektronika, ny Solontena Maharitry ny PNUD. Fotoana ihany koa izany nampahafantarana ny sehatra an-tserasera ahafahana manara-maso ara-potoana ny fahavoazana ateraky ny loza voajanahary.

Nangataka ny hanaovana fampahafantarana ofisialy ity sehatra an-tserasera ity miaraka amin’ny Lehiben’ny Governemanta ny PNUD (Système des Nations Unies). Nomen’ny Praiminisitra toromarika ny hanatanterahana izany alohan’ny 10 oktobra 2026, ary hampiarahana amin’ny fanolorana ny drafitra fiomanana amin’ny voka-dratsin’ny El Niño.

Nodinihina nandritra ny fihaonana ihany koa ny fampifanarahana ny fandraisan’anjaran’ireo mpiara-miombon’antoka amin’ireo filàna voafaritra ao anatin’ny PDNA, mba hahafahan’ny fanampiana sy ny fampiasam-bola mifantoka amin’ireo laharam-pahamehana tena ilaina amin’ny fanarenana.

Hatao miaraka amin’ireo ekipa teknika, anisan’izany ny Direction Générale des Investissements Publics (DGIP), ihany koa ny fanadihadiana ara-bola momba ny drafitra fanarenana.

Nohamafisin’ny PNUD ny fahavononany hanohy ny fiaraha-miasa amin’ny Governemanta amin’ireo laharam-pahamehana napetraka. Anisan’izany ny sehatry ny fanovana nomerika, miaraka amin’ny ministera misahana izany, indrindra amin’ny Digital Readiness Assessment sy ny fanamafisana ny fotodrafitrasa ara-nomerika, ka isan’ny laharam-pahamehana ny data center.

𝗡𝘆 𝗦𝗲𝗿𝗮𝘀𝗲𝗿𝗮