𝐅𝐈𝐃𝐈𝐍𝐀𝐍𝐀 𝐈𝐅𝐎𝐓𝐎𝐍𝐘 𝐒𝐘 𝐅𝐀𝐍𝐄𝐍𝐓𝐀𝐍𝐀𝐍𝐀 𝐌𝐎𝐌𝐁𝐀 𝐍𝐘 𝐅𝐈𝐊𝐀𝐎𝐍𝐀𝐍𝐃𝐎𝐇𝐀𝐌-𝐏𝐈𝐑𝐄𝐍𝐄𝐍𝐀

Nidina ifotony tao amin’ny Kaominina Ambanivohitr’Andriba, Distrikan’i Maevatanàna, ny Talem-paritra misahana ny Fanavaozana Betsiboka Atoa Ramaroso Moîse, niaraka tamin’ireo Lehiben’ny Sampandraharaham-panjakana, nitondra teny fampahafantarana sy fanentanana momba ny Fikaonandoham-pirenena iarahana amin’ny FFKM.

Nandray anjara tamin’izany ny Ben’ny Tanàna sy ny Lefiny, Mpanolontsaina kaominaly, Sefo Fokontany 15 sy ny Lefiny, mpitondra Fiangonana, Raiamandreny ara-drazana, fikambanam-behivavy sy fikambanana samihafa, mpampianatra, Talen-tsekoly ary ireo Sefo ZAP.

Liana sy nandray anjara mavitrika ny vahoaka, indrindra nandritra ny fanontaniana sy valin-teny, izay nahafahan’izy ireo nametraka ireo olana sedrainy sy nanolotra soso-kevitra ary vahaolana.

Naneho fahavononana handray anjara amin’ny Fikaonandoham-pirenena miainga avy any amin’ny Fokontany ireo mpandray anjara, ho sehatra ahafahan’ny vahoaka maneho ny hetahetany sy mandray anjara amin’ny fananganana vahaolana ho an’ny Firenena.

Tao anatin’ny filaminana, fifanajana ary fifampihainoana tanteraka no nanatanterahana ny fihaonana.

# MCR # Fanavaozana

# Fifanajana

# Fiarahamientana

# Fanolorantena