𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-23 𝒔𝒆𝒑𝒕𝒂𝒎𝒃𝒓𝒂]

Noraisin’ny Praiminisitra, Lehiben’ny Governemanta, RAJAONARISON Mamitiana, androany ireo tanora malagasy hiatrika ny Olympiade Internationale sur la Sécurité Financière, hotanterahina any Krasnayark, Rosia, ny 27 septambra ka hatramin’ny 2 oktobra 2026.

Mpianatra miisa 15 no hisolontena an’i Madagasikara amin’ity fifaninanana iraisam-pirenena ity. Ny 10 amin’izy ireo, sokajy Oniversite, dia avy amin’ny UCM, Oniversiten’Antananarivo ary INSCAE. Mpianatra 5 kosa no ao amin’ny sokajy Collège sy Lycée, avy amin’ny Lycée Andoharanofotsy, Vanille Chocolat, Peter Pan, ESCA ary Claire Fontaine.

Nandritra ny fihaonana dia nitondra hafatra ho an’ireo tanora sy ny delegasiona ny Praiminisitra, mialoha ny handehanan’izy ireo hisolo tena an’i Madagasikara amin’ity sehatra iraisam-pirenena ity.

Ireo mpianatra ireo dia voafantina tamin’ny alalan’ny fifaninanana an-tserasera nokarakarain’ny Federasiona Rosiana. Mifantoka indrindra amin’ny ady amin’ny famotsiam-bola sy ny famatsiam-bola ny asa fampihorohoroana (LBC/FT) ny taranja hifaninanana, ka noho izany dia ny Tale Jeneraly mpisolo toerana ao amin’ny SAMIFIN no mitarika ny delegasiona malagasy, izay ahitana ireo mpianatra 15 sy mpanaraka 5.

Efa nandray anjara tamin’ity Olympiade ity i Madagasikara tamin’ny taona 2025, tao amin’ny sokajy Oniversite, ary iray tamin’ireo mpianatra malagasy no nahazo ny mari-boninahitra “lauréat”. Amin’ity taona 2026 ity kosa no sambany handraisan’i Madagasikara anjara amin’ny sokajy Collège sy Lycée.

Fotoana iray ahafahan’ireo tanora malagasy mampiseho ny fahalalany sy ny fahaiza-manaony ary misolo tena ny firenena eo amin’ny sehatra iraisam-pirenena ity fifaninanana ity.

𝗡𝘆 𝗦𝗲𝗿𝗮𝘀𝗲𝗿𝗮