𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-23 𝒔𝒆𝒑𝒕𝒂𝒎𝒃𝒓𝒂 2026]

Notanterahina androany tao amin’ny Novotel Antananarivo ny fihaonan’ny Governemanta tamin’ireo Mpiara-miombon’antoka ara-teknika sy ara-bola (PTF), teo ambany fitarihan’ny Praiminisitra, Lehiben’ny Governemanta, RAJAONARISON Mamitiana.

Ity fihaonana ity dia tafiditra ao anatin’ny fanavaozana ny fitantanana ny fampiasam-bolam-panjakana, indrindra ireo famatsiam-bola avy any ivelany, ka tanjona ny hirosoana amin’ny fitantanana mirindra kokoa, mifototra amin’ny laharam-pahamehan’ny Governemanta sy ny vokatra andrasana eny ifotony.

Nandritra ny fihaonana dia naseho tamin’ireo mpiara-miombon’antoka ny tombana nohavaozina momba ireo famatsiam-bola avy any ivelany, ary nozaraina ihany koa ireo toromarika stratejika sy ara-pampiharana ho fanatsarana ny fitantanana ny fampiasam-bolam-panjakana. Nojerena manokana ireo sakana mbola mampiadana ny fanatanterahana ireo tetikasa lehibe, mba hahafahana manafaingana ny vokatra eny ifotony.

Nohamafisin’ny Praiminisitra RAJAONARISON Mamitiana fa zava-dehibe ny fifampiresahana tsy tapaka eo amin’ny Governemanta sy ireo Mpiara-miombon’antoka ara-teknika sy ara-bola, mba hampiorina ny fifankahazoana sy ny fifampitokisana eo amin’ny roa tonta.

Tanjona ny hampiray zotra sy hampifanaraka ireo asa sy laharam-pahamehana, mba tsy hisy sakana hampiadana ny fanatanterahana ny tetikasa sy ny fampiasam-bola, fa hahafahana kosa manafaingana azy ireny sy mampitombo ny vokatra azo avy aminy.

Nambaran’ny Lehiben’ny Governemanta fa voaray avokoa ireo fanamarihana sy fanontaniana napetrak’ireo mpiara-miombon’antoka. Nohamafisiny fa hanao ny ezaka rehetra ny Fanjakana amin’ny famahana ireo olana sy fanatsarana ny fandrindrana, mba handeha haingana kokoa ny fampiasam-bolam-panjakana ary hiteraka tombontsoa mivaingana sy tsapan’ny olom-pirenena eo amin’ny fiainany andavanandro.

Araka izany, tsy tokony hijanona amin’ny famatsiam-bola sy ny fanatanterahana tetikasa fotsiny ny ezaka atao, fa tokony hahatonga ireo fampiasam-bola ireo hisy fiantraikany mivantana amin’ny fiainan’ny vahoaka sy ny fampandrosoana ny firenena.

Anisan’ny vokatra andrasana amin’ity sehatra fifanakalozan-kevitra ity ny fanamafisana maharitra ny fifampiresahana sy ny fandrindrana eo amin’ny Governemanta sy ireo PTF, ny fametrahana andraikitra iarahan’ny roa tonta amin’ny fanatsarana ny fitantanana ny fampiasam-bolam-panjakana, ary ny fiaraha-mientana hamahana ireo sakana manemotra ny fanatanterahana ireo tetikasa lehibe.

Ny fihaonana dia nokarakarain’ny Primatiora, tamin’ny alalan’ny Direction Générale des Investissements Publics (DGIP), ary nahitana ny fandraisan’anjaran’ireo ministera voakasika sy ireo mpiara-miombon’antoka ara-teknika sy ara-bola eto Madagasikara, ahitana ireo mpamatsy vola iraisam-pirenena sy ireo sampan-draharahan’ny Firenena Mikambana.

𝗡𝘆 𝗦𝗲𝗿𝗮𝘀𝗲𝗿𝗮