𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-22 𝒔𝒆𝒑𝒕𝒂𝒎𝒃𝒓𝒂 2026]

Omaly 21 septambra 2026, no tany Betroka, Faritra Anosy, ny Praiminisitra, Lehiben’ny Governemanta, RAJAONARISON Mamitiana, niaraka tamin’ny Mpandrindra Maharitra ny Firenena Mikambana eto Madagasikara, Anthony Ngororano, ireo manampahefana eo an-toerana, ireo solontenan’ny sampan-draharahan’ny Firenena Mikambana ary ireo mpiara-miombon’antoka iraisam-pirenena, nanamarika ny Andro Iraisam-pirenena ho an’ny Fandriampahalemana.

Tao anatin’izany no nanaovan’ny delegasiona fitsidihana tao amin’ny Kaominina Kelivaho, nihaonana tamin’ireo vondrom-piarahamonina misitraka ny fanohanan’ny Firenena Mikambana amin’ny alalan’ireo fandaharan’asa tohanan’ny Fonds des Nations Unies pour la Consolidation de la Paix (PBF).

Nisongadina nandritra ny fotoana ny fanavaozan’ireo vondrom-piarahamonina ny fanoloran-tenany ho mpandray anjara mavitrika amin’ny fanorenana sy fitandroana ny fandriampahalemana, izay naseho tamin’ny alalan’ny fomba nentim-paharazana « Tsitsika ».

Nohamafisin’ny Praiminisitra fa fototra iorenan’ny fampandrosoana maharitra ny fandriampahalemana sy ny filaminana. Manoloana ireo fandrosoana efa hita ao Betroka sy ny Massif de l’Andriry, dia mitohy ny ezaky ny Fanjakana amin’ny fanamafisana ny fisiany eny ifotony, ny fanatsarana ny fahazoan’ny mponina ireo tolotra ho an’ny daholobe ary ny famoronana fahafahana ara-toekarena. Miankina ihany koa amin’ny fandraisan’anjaran’ny vondrom-piarahamonina, ny manampahefana eo an-toerana ary ny fiaraha-miasa amin’ireo mpiara-miombon’antoka ny faharetan’ireo vokatra efa azo.

Notsiahivin’ny Mpandrindra Maharitra ny Firenena Mikambana, Anthony Ngororano, fa efa 10 taona izao no nanohanan’ny Fonds des Nations Unies pour la Consolidation de la Paix an’i Madagasikara, ary maherin’ny 52 tapitrisa dolara amerikana no efa navondrona nanomboka ny taona 2016, indrindra ho fanohanana ireo hetsika any Atsimon’i Madagasikara. Notsindriany fa ny fandriampahalemana maharitra dia mila miorim-paka eny anivon’ny tanàna, ny fianakaviana ary ny fiarahamonina.

Ny fitsidihana dia nahafahana nijery ireo fandrosoana vita tao anatin’ny taona maro teo amin’ny fanamafisana ny fandriampahalemana, ny fisorohana ny disadisa, ny filaminana, ny firaisankina ara-tsosialy ary ny fampandrosoana ao amin’iny faritra Atsimon’i Madagasikara iny. Vokatry ny fiaraha-mientan’ny Fanjakana, ireo sampan-draharaham-panjakana, ny vondrom-bahoaka, ny mpitandro ny filaminana ary ireo mpiara-miombon’antoka amin’ny fampandrosoana izany.

Nofaranana tamin’ny Karav’alina, izay namarana ny Caravane de la Paix ho fanamarihana ny faha-10 taonan’ny PBF teto Madagasikara, ny hetsika. Nampivondrona ny mponina sy ny manampahefana izany, tao anatin’ny firaisankina sy ny fanoloran-tena iombonana ho amin’ny fandriampahalemana maharitra.

𝗡𝘆 𝗦𝗲𝗿𝗮𝘀𝗲𝗿𝗮