𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-19 𝒔𝒆𝒑𝒕𝒂𝒎𝒃𝒓𝒂 2026]

Niverina an-tanindrazana androany, 19 Septambra 2026, ny Praiminisitra, Lehiben’ny Governemanta, RAJAONARISON Mamitiana, taorian’ny iraka ofisialy notanterahiny tany amin’ny Repoblika Entim-bahoakan’i Sina.

Tonga nitsena azy teny amin’ny Seranam-piaramanidina Iraisam-pirenena Ivato ny Ambasadaoron’ny Repoblika Entim-bahoakan’i Sina miasa eto Madagasikara, ho mariky ny fifandraisana sy ny fiaraha-miasa eo amin’ny firenena roa tonta.

Nifantoka tamin’ny fanamafisana ny fiaraha-miasa sy ny fitadiavana vahaolana azo ampiharina amin’ny fampandrosoana an’i Madagasikara ny iraka, indrindra eo amin’ny sehatry ny fambolena, ny teknolojia sy ny nomerika, ny fitaterana, ny fikarohana ara-tsiansa, ny meteorolojia, ny teknolojia zanabolana ary ny fiarovana ny tontolo iainana.

Tany Hunan, nitsidika ny Académie des sciences agricoles du Hunan ny Praiminisitra, izay nahitana sonia fifanarahana. Tao amin’ny Université du Hunan kosa dia natomboka ny Centre d’étude de Madagascar, ary nisy ny fihaonana tamin’ireo mpianatra Malagasy.

Nitsidika ny toeram-pivarotana Lianhua ihany koa ny Lehiben’ny Governemanta, nahafahany nijery mivantana ny fisian’ny henan’ondry avy eto Madagasikara eo amin’ny tsena sinoa.

Tao Zhuzhou, nandray anjara sy nandaha-teny tamin’ny Fihaonambe Iraisam-pirenena faha-5 momba ny fampiasana ny rafitra zanabolana BeiDou ny Praiminisitra. Nisy ihany koa ny fifanakalozana tamin’ireo mpandraharaha sy ny fitsidihana orinasa ary ivon-toerana misahana ny teknolojia, ny fitaterana an-dalamby, ny zanabolana ary ny meteorolojia.

Tao Shibadong, nijery akaiky ireo traikefa momba ny fampandrosoana eny ifotony sy ny fampihenana ny fahantrana ny Praiminisitra. Tao Shenzhen kosa, nifantoka tamin’ny sehatry ny teknolojia nomerika sy ny tontolo iainana ny fitsidihana, anisan’izany ny Sangfor Technologies, Huawei Technologies ary ny Centre international des mangroves.

Ity iraka ity dia natao hanamafisana ny fiaraha-miasa sy hitadiavana fahaiza-manao, teknolojia ary traikefa azo ampifanarahana amin’ny filàn’i Madagasikara, ao anatin’ny fanajana hatrany ny laharam-pahamehana sy ny tombontsoam-pirenena Malagasy.

Rehefa tafaverina an-tanindrazana, dia mitohy ny fanaraha-maso ireo fifanakalozana sy fiaraha-miasa nodinihina nandritra ny iraka, mba hahafahan’izy ireo mivadika ho vokatra azo tsapain-tanana ho an’ny fampandrosoana sy ny fiainan’ny Malagasy.

#PrimatureMadagasikara #MadagasikaraSina #FiarahaMiasa #Fampandrosoana #Diplomasia

𝗡𝘆 𝗦𝗲𝗿𝗮𝘀𝗲𝗿𝗮