Nitohy tao amin’ny Kaominina Ambodiriana, Distrika Toamasina II, ny iraka notanterahin’ny Fitaleavana misahana ny Dinam-pitondran-tena sy ny Tandrohasin’ny Asam-bahoaka ao amin’ny Faritra Atsinanana.

 

Tanjona ny fanatanterahana ireo asa savaranonando, ny fanomanana ny fametrahana Ivotoerana fandraisana ny fitarainan’ny olom-pirenena (Guichet Physique de Doléances), ary ny hahafantarana ireo filàna sy fepetra ilaina amin’ny fametrahana izany eo anivon’ny Kaominina.

 

Ny delegasiona, notarihin’ny Tale misahana ny Dinam-pitondran-tena sy ny Tandrohasin’ny Asam-bahoaka, Atoa Jerry EDOUARD, dia noraisin’ny Ben’ny Tanànan’ny Kaominina Ambodiriana, Atoa RAYM Ialy Mohamed, niaraka tamin’ny Lefitra Voalohan’ny Ben’ny Tanàna sy ny Lefitry ny Filohan’ny Filankevitra Kaominaly.

 

 Nandritra ny fifanakalozana dia nisongadina ny maha-zava-dehibe ny fanamafisana ny fahaiza-manao sy ny fahaizan’ireo mpiasa hiandraikitra ny Ivotoerana fandraisana ny fitarainana, mba hahafahan’izy ireo mandray sy manaraka araka ny tokony ho izy ny fitarainan’ny olom-pirenena.

 

 Nojerena manokana ihany koa ny lafiny famatsiana angovo azo avy amin’ny herin’ny masoandro, noho ny maha-kaominina ambanivohitra an’Ambodiriana sy ny mbola tsy fahatongavan’ny herinaratra ao amin’ny faritra, mba hanamorana ny fampandehanana ny biraon’ny Kaominina sy ny Ivotoerana kasaina hapetraka.