𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-1 𝒔𝒆𝒑𝒕𝒂𝒎𝒃𝒓𝒂 2026]

Notanterahina androany, teto Mahazoarivo, ny famoahana ireo mpiofana nahavita fiofanana manokana momba ny fiarovana olo-manankaja ambony (protection rapprochée), tao anatin’ny fanamafisana ny fiaraha-miasa ara-miaramila eo amin’i Madagasikara sy ny Federasionan’i Rosia.

Nandritra ny roa volana, miisa 13 ireo nandray anjara tamin’ny fiofanana, notarihin’ireo manampahaizana Rosiana, izay nifantoka tamin’ny fitifirana, taktika, vonjy taitra ara-pitsaboana, fiarovana manoloana ny loza ara-simika, fanomanana ara-tsaina ary fampiharana tranga samihafa amin’ny iraka fiarovana.

Nandritra ny lahateniny, ny Praiminisitra, Lehiben’ny Governemanta, dia nanamafy fa asa manana ny hasiny sy andraikitra lehibe ny fiambenana ireo olo-manankaja ambony, ka tokony hisy ny fijerena manokana sy ny fanomezana lanja ireo mpisehatra amin’izany.

Nisaotra manokana ireo mpampiofana avy amin’ny Tafika Rosiana ihany koa ny Praiminisitra noho ny fizarana traikefa sy fahaiza-manao, ary nanambara fa mendrika ny hotolorana ny fankasitrahana avy amin’ny Fanjakana Malagasy izy ireo noho ny anjara birikiny tamin’ny fanamafisana ny fahaiza-manaon’ireo mpiofana.

Anisan’ny nisongadina tamin’ity fiofanana ity ny nahazoan’ny Kapiteny ANDRIAMAHAZORIVO Reynolds Sitraka Iombonana, Komandin’ny Holafy Fibaikona ao anivon’ny Bataillon de Sécurité de la Primature (BSP), ny maripahaizana ho Mpampiofana Manampahaizana manokana amin’ny fiarovana olo-manankaja ambony, ka izy irery tamin’ireo mpiofana 13 no nahatratra io ambaratonga io.

Maneho ny finiavan’i Madagasikara sy i Rosia hanamafy hatrany ny fiaraha-miasa amin’ny fanofanana manokana ity dingana ity, ho fananana mpiasa matihanina, voafehy ary vonona hiatrika amim-pahombiazana ireo andraikitra sahaniny.

#Primature #BSP #FiarahaMiasaAraMiaramila #Madagasikara #Rosia

𝗡𝘆 𝗦𝗲𝗿𝗮𝘀𝗲𝗿𝗮