Ho fanohanana ny tanora malagasy handray anjara bebe kokoa amin’ny fampandrosoana ny firenena dia nahazo fiofanana fanamafisana traikefa momba ny politikam-panjakana ao anatin’ny Fanavaozana (Renforcement de capacités des jeunes leaders sur la politique publique dans le cadre de la Refondation) avy amin’ny Fandaharanasan’ny Firenena Mikambana ho an’ny Fampandrosoana (PNUD) ireo tanora mpitarika misolo tena ny faritra 24.

 

Tao aorian’ny fampiofanana noraisin’izy ireo dia nanao fampiharana teny anivon’ny minisitera izy ireo ka solontena 4 avy amin’ny faritra Matsiatra Ambony, Androy, Analanjirofo sy Alaotra Mangoro no nisafidy ny Minisitera misahana ny Fanavaozana.

 

Hoy azy efatra mianadahy dia nahafahan’izy ireo nahalala bebe kokoa ny sehatry ny asam-panjakana sy ny iraka samihafa iantsorohan’ny Minisitera misahana ny Fanavaozana ny fiaraha-miasa fa indrindra koa nahatsapana fa misy mihaino ny hetahetan’ny tanora ary afaka avadika ho politika sy asa ho amin’ny fampandrosoana izany.

 

Fantatra hatrany koa hoy izy ireo ny tena hevitry ny hoe Fanavaozana tiana apetraka eto amin’ny firenena ary nanamafy ny fahavononan’izy ireo hitondra ny anjara birikiny amin’izany ireto tanora mpitarika ireto. Aorian’izao, handrafitra politikam-pandrosoana ireto tanora mpitarika ireto ho entiny any amin’ny faritra nihaviany avy.

 

Izany dia miainga amin’ny olana iainan’ny tanora eny ifotony ary hitondran’izy ireo vahaolana. Hitantsoroka azy ireo amin’ny fanomanana izany antontan-kevitra izany ny tompon’andraikitra eo anivon’ny Minisitera misahana ny Fanavaozana.