Tonga nitsidika ny Fitaleavam-paritry ny Fanavaozana Analanjirofo ny 27 Aogositra 2026 ny Tale Jeneralin’ny Fikaonandoham-pirenena Atoa Rahajary Tsialoninarivo sy ny Tale misahana ny Fanohanana sy Fanaraha-maso ny Fikaonandoham-pirenena Atoa Rakotomalala Jeddy avy amin’ny Minisitera Misahana Fanavaozana.

 

Nisy ny fihaonana sy fifanakalozan-kevitra tamin’ireo mpiara-miasa ao amin’ny Fitaleavam-paritra, ka nohazavaina tamin’ny ankapobeny ny firafitry ny Minisiteran’ny Fanavaozana sy ny andraikitry ny sampan-draharaha tsirairay.

 

Nohamafisin’ny Tale Jeneralin’ny Fikaonandoham-pirenena ihany koa fa, ankoatra ny Fikaonandoham-pirenena izay tarihin’ny FFKM, dia manana andraikitra lehibe hafa ny Minisiteran’ny Fanavaozana, toy ny:

 

Fametrahana ny Dina ara-mpitondran-tena sy tandrohasina (Pacte moral et éthique) ;

Fandrefesana ny fahafaham-pon’ny vahoaka amin’ny Fanjakana sy ny asa sahaniny (redevabilité publique) ;

 

Fampiroboroboana sy fanajana ny zo maha-olona (droits humains).

 

Zava-dehibe ho an’ny Fitaleavam-paritra Misahana ny Fanavaozana Analanjirofo izao fihaonana mivantana izao, satria ahafahana mifampiresaka amin’ny tompon’andraikitra, mifanakalo vaovao ary manamafy ny fiaraha-mientana ho amin’ny fanatanterahana ny Fanavaozana.