𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-21 𝒂𝒐𝒈𝒐𝒔𝒊𝒕𝒓𝒂 2026]

Nivory tao amin’ny Lapan’i Mahazoarivo androany ireo solontenan’ny sokajin-kery/olona samihafa izay hanana solontena handrafitra ny Komity Teknika misahana ny fanomanana ny Fikaonan-doham-pirenena.

Notarihin’ny Praiminisitra, Lehiben’ny Governemanta, Mamitiana Rajaonarison, ny fihaonana. Nandritra izany no nanazavana ny antsipirihan’ny didim-panjakana mamaritra ny andraikitra sy ny firafitry ny Komity Teknika, ary nampahatsiahivana ny antony sy ny tanjona lehibe amin’ny fananganana azy sy ny fanatanterahana ny Fikaonan-doham-pirenena.

Notsindrian’ny Praiminisitra fa :

« Ny Malagasy samy Malagasy no mandamina ny raharaham-pirenena. Ny avy any ivelany dia manohana sy manampy, fa isika Malagasy no tompon’andraikitra amin’ny famaritana ny hoavin’ny firenentsika. »

Nohamafisiny fa fotoana lehibe izao hiatrehana sy hamahana ireo olana fototra mampiverimberina ny krizy eto Madagasikara, ka tsy tokony havela handalo fotsiny ity dingana manan-tantara ho an’ny firenena ity.

Aorian’izao fihaonana izao dia hiverina any amin’ny sokajin-kery/olona misy azy avy ireo solontena, hifampidinika sy hanolotra ireo anarana hotendrena ho mpikambana ao amin’ny Komity Teknika.

« Asa masina ho an’ny firenena » no namaritan’ny Praiminisitra ny andraikitra miandry ireo mpikambana ao amin’ny Komity. Izy ireo no handinika sy hitondra tolo-kevitra amin’ireo lafin-javatra marolafy, mba hahatomombana sy hahomby ny fanomanana ary ny fanatanterahana ny Fikaonan-doham-pirenena.

Ny tanjona dia ny hametraka sehatra ahafahan’ny Malagasy miara-mandinika, miara-mamaritra ary miara-manorina vahaolana maharitra ho an’ny firenena.

#Primatiora #FikaonanDohamPirenena #KomityTeknika #Fanavaozana #Madagasikara

𝗡𝘆 𝗦𝗲𝗿𝗮𝘀𝗲𝗿𝗮