[𝑭𝒂𝒉𝒂-15 𝒂𝒐𝒈𝒐𝒔𝒊𝒕𝒓𝒂 2026]

Tsy fitaovana handrakofana ny tsy rariny na hanakonana izay tsy mety velively ny fampihavanana. **Ny tena fampihavanana dia fahasahiana miatrika ny marina, manaiky ny lesoka, mifamela ary mamerina manorina ny fifampitokisana.** Dingana iray tsy azo ihodivirana izany raha te hiroso amin’ny fanavaozana marina sy ny fampandrosoana maharitra i Madagasikara.

**Ohatra velona amin’izany ny famitranam-pihavanana natao tany Ambovombe.**

Nandritra ny famitranam-pihavanana teo amin’ny **Filohan’ny Fanavaozana, Kolonely Michaël RANDRIANIRINA**, sy ireo Solombavambahoaka **MILAVONJY Andriasy Philobert** ary **HENRI Jean Michel**, dia nisy ny fifamelana tamin’ny ratsy nifanaovana sy ny famerenana indray ny fihavanana ary ny fifampitokisana.

Fotoana nanamarihana mazava izany fa, na eo aza ny tsy fitovian-kevitra sy ny zava-nitranga teo aloha, dia azo atao hatrany ny mifamela sy miara-miroso rehefa ny tombontsoan’ny firenena no atao lohalaharana.

Niray feo izy ireo niantso ny Malagasy rehetra mba hiroso amin’ny **fampihavanana marina, lalina ary maharitra**.

**Ny fitiavan-tanindrazana no tokony hibaiko, fa tsy ny tombontsoa manokana.**

Rehefa ny tanindrazana sy ny soa iombonana no apetraka ho ambony indrindra, dia mihamafy ny firaisankina ary misokatra ny lalana mankany amin’ny fampandrosoana.

**Iray isika na dia samy hafa aza.**

Tsy tokony hampisaraka antsika ny tsy fitovian-kevitra, ny fironana ara-politika na ny fomba fijery. Ny fahasamihafana kosa dia tokony ho hery manosika antsika hifampihaino, hifanaja ary hifanatona.

**Tsy ampy ny fahalalana raha tsy misy fitiavana sy fanetren-tena.**

Na maro aza ny nahita fianarana sy manam-pahaizana, dia sarotra ny hahatongavana amin’ny fihavanana raha mbola manjaka ny hambom-po sy ny fifandrafiana. Fotoana izao hametrahana ny fifanajana sy ny fifankatiavana ho fototry ny fiaraha-monina.

**Aleo miara-mandeha aloha, dia mifanaraka eny an-dalana.**

Ny fahavononana hiara-hipetraka, hifampihaino ary hiara-handroso no manokatra ny lalana mankany amin’ny fifanarahana sy ny fandriampahalemana iombonana.

**Ny tena fihavanana dia miainga amin’ny fo: fo vonona hifamela, hanitsy amim-pitiavana, tsy hankahala ary tsy hanalabaraka.**

Koa antsoina ny Malagasy rehetra mba **hanokatra ny fo, hampandefitra ny hambom-po, hametraka ny tanindrazana ho ambonin’ny tombontsoa manokana, ary hiara-hanorina ny hoavin’i Madagasikara.**

**Satria tsy misy fanavaozana maharitra raha tsy misy fihavanana marina, ary tsy misy fampandrosoana matanjaka raha tsy misy firaisankina.**

#PrimatureMadagascar #Fampihavanana #FitiavanTanindrazana #FihavananaMalagasy #Firaisankina #Fanavaozana #Ambovombe

𝗡𝘆 𝗦𝗲𝗿𝗮𝘀𝗲𝗿𝗮