𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-30 𝒔𝒆𝒑𝒕𝒂𝒎𝒃𝒓𝒂 2026]

Nandray an’Andriamatoa JI Ping, Ambasadaoron’ny Repoblika Entim-bahoakan’i Sina eto Madagasikara, ny Praiminisitra, Lehiben’ny Governemanta, androany maraina, tao amin’ny Lapan’i Mahazoarivo. Fitsidihana fanaovam-beloma izao, noho ny fahataperan’ny iraka diplaomatika notanterahin’ny Ambasadaoro teto Madagasikara.

Nifantoka tamin’ny fanamafisana ny fiaraha-miasa eo amin’i Madagasikara sy Sina ny dinika, indrindra eo amin’ny sehatry ny fambolena, angovo, fotodrafitrasa, varotra, fizahantany ary fiarovana.

Anisan’ireo tetikasa lehibe noresahina ny dingana faharoa amin’ny tetikasa « Riz hybride », miaraka amin’ny fanohanana mitentina 20 tapitrisa Yuan, ho fanohanana ny ezaka ataon’i Madagasikara amin’ny fanatrarana ny fahavitan-tena ara-tsakafo. Voaresaka ihany koa ireo tetikasa momba ny famokarana herinaratra, fanatsarana ny lalana sy fotodrafitrasa, ary ny fanarenana fotodrafitrasa ao Toamasina.

Nasongadina nandritra ny fihaonana ihany koa ny fitomboan’ny fifanakalozana ara-barotra eo amin’ny firenena roa tonta sy ny fahafahan’ireo vokatra malagasy miditra bebe kokoa amin’ny tsena sinoa, indrindra ireo vokatra ara-pambolena sy fiompiana. Eo amin’ny fizahantany kosa dia nodinihina ny mety hamerenana ny sidina mivantana mampitohy an’i Sina sy Madagasikara, ho fanamafisana ny fivezivezen’ny olona sy ny fifanakalozana ara-toekarena.

Nankasitraka ny vokatra azo tsapain-tanana avy amin’ny fiaraha-miasa amin’i Sina ny Praiminisitra, indrindra ireo tetikasa mifandray mivantana amin’ny filàn’ny mponina. Nohamafisiny fa hanohy ny ezaka i Madagasikara amin’ny fanatsarana ny kalitaon’ny vokatra fanondrana, fanamorana ny fampiasam-bola ary fanatsarana ny tontolon’ny fandraharahana.

Nifanaraka ny roa tonta fa hotohizana sy hamafisina hatrany ny fiaraha-miasa mba hahafahan’ireo tetikasa iarahana manatanteraka mitondra vokatra mivaingana sy mifanaraka amin’ireo laharam-pahamehan’ny fampandrosoana eto Madagasikara.

𝗡𝘆 𝗦𝗲𝗿𝗮𝘀𝗲𝗿𝗮