𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐

[𝑭𝒂𝒉𝒂-24 𝒔𝒆𝒑𝒕𝒂𝒎𝒃𝒓𝒂 2026]

Antananarivo, 24 septambra 2026 – Notontosaina androany teny anivon’ny Primatiora ny atrikasa fampahafantarana sy fanentanana momba ny fitsipi-pifehezana ara-tetibola sy ara-bola, nokarakarain’ny Conseil de Discipline Budgétaire et Financière (CDBF) ho an’ireo tompon’andraikitra ambony sy ireo mpisehatra amin’ny fitantanana ny volam-panjakana eo anivon’ny Primatiora.

Ity hetsika ity dia tafiditra ao anatin’ny fandaharan’asan’ny CDBF amin’ny taona 2026, izay mikendry ny hanamafy ny fahalalana sy ny fahazoan’ireo tompon’andraikitra ny andraikitry ny CDBF, ny lalàna sy ny fitsipika mifehy ny fitantanana ny volam-panjakana, ary ireo fahadisoam-pitantanana mety hiteraka sazy. Natao ihany koa izy ity mba hametrahana sehatra fifanakalozan-kevitra mivantana eo amin’ireo mpisehatra ara-tetibola sy ny CDBF.

Ny CDBF, izay rafitra napetraka eo anivon’ny Praiminisitra, Lehiben’ny Governemanta, dia manana andraikitra amin’ny fisorohana sy ny fanasaziana ireo fahadisoam-pitantanana eo amin’ny sehatry ny volam-panjakana, ho fampiroboroboana ny fitantanana ara-bola mendrika sy tompon’andraikitra.

Nandritra ny fandraisam-pitenenany dia nanamafy ny Praiminisitra, Lehiben’ny Governemanta, RAJAONARISON Mamitiana, fa mifamatotra mivantana amin’ny fampandrosoana sy ny fanatsarana ny fari-piainan’ny mponina ny fomba fitantanana ny volam-panjakana.

« Rehefa tsara tantana ny volam-panjakana dia mivoatra sy mihatsara ny fiainan’ny Malagasy. »

Notsindriany fa tsy resaka fanajana ny lalàna sy ny fitsipika ihany ny fitantanana madio sy mahomby, fa fototra iray hananganana indray ny fifampitokisana eo amin’ny vahoaka sy ny mpitantana ny raharaham-panjakana.

« Rehefa madio ny fitantanana ny volam-panjakana dia tsy misy ny krizy satria mifampatoky ny mpitondra ny raharaham-bahoaka sy ny vahoaka », hoy ny Praiminisitra.

Nambarany ihany koa fa anisan’ny fanamby lehibe eto amin’ny firenena ny famerenana izany fifampitokisana izany. Araka ny fanazavany, ny tena fampihavanana ilain’ny firenena dia ny fampihavanana ny mpitondra sy ny vahoaka, satria ny fahaverezan’ny fifampitokisana no isan’ny olana mila harenina. Ny mangarahara, ny fahitsiana ary ny fandraisana andraikitra amin’ny fitantanana ny volam-bahoaka no isan’ny lalana lehibe ahafahana mametraka indray izany fifampitokisana izany.

Notsiahivina nandritra ny atrikasa fa ny teti-bolam-panjakana dia tsy tokony horaisina ho lisitry ny fandaniana na tetikasa fotsiny, fa fitaovana entina manatanteraka ny vina sy ny laharam-pahamehan’ny Fanjakana. Noho izany, ny ariary tsirairay avy amin’ny hetra, ny haba sy sara, ary koa ireo vola azo avy amin’ireo mpiara-miombon’antoka, dia tokony hampiasaina amim-pahitsiana sy amim-pahombiazana ho amin’ny asa fampandrosoana.

Misy fiantraikany mivantana amin’ny fiainan’ny vahoaka ny kalitaon’ny fitantanana ny volam-panjakana. Ny fahadisoam-pitantanana, ny fandaniam-bola tsy voafehy na ny tsy fanajana ny fomba fiasa dia mety hanemotra ireo asa fampandrosoana, toy ny fanamboarana lalana, ny fanatsarana ny hopitaly sy ny tolotra ara-pahasalamana, ary ny fanatsarana ny sekoly sy ny tontolon’ny fampianarana.

Nohamafisina araka izany fa andraikitra mavesatra fa tsy tombontsoa manokana ny fitantanana ny volam-bahoaka, ka ny mpisehatra rehetra eo amin’ny rojo ara-tetibola sy ara-bola dia tokony hanaiky ny tamberin’andraikitra mifanaraka amin’ny andraikiny.

Nambaran’ny Praiminisitra ihany koa fa tokony hipetraka ho modely azo alain-tahaka ny Primatiora amin’ny fitantanana mangarahara sy manaja ny fitsipi-pifehezana ara-tetibola sy ara-bola. Izany indrindra no maha-zava-dehibe ny fanombohana ity fanentanana eo anivon’ny andrim-panjakana ity amin’ny Primatiora. Efa nanatanteraka hetsika fampahafantarana tany amin’ny faritra sy antokon-draharaham-panjakana maro ny CDBF, ary mitohy ny fanitarana izany amin’ireo andrim-panjakana samihafa.

Nentanina ireo tompon’andraikitra sy mpisehatra rehetra handray anjara mavitrika amin’ny fametrahana kolontsain’ny fahitsiana, ny mangarahara, ny fitsipi-pifehezana ary ny tamberin’andraikitra eo amin’ny fitantanana ny raharaham-panjakana, mba hahatonga ny volam-panjakana ho tena fitaovana mitondra fampandrosoana azo tsapain-tanana sy fanatsarana ny fiainan’ny Malagasy.

𝗡𝘆 𝗦𝗲𝗿𝗮𝘀𝗲𝗿𝗮