Noraisin’ny Minisitra misahana ny Fanavaozana, Maître Hanitra Razafimanantsoa tao amin’ny birao fiasany ny Sekretera Jeneralin’ny OEACP (Organisation des États d’Afrique, des Caraïbes et du Pacifique) Atoa Moussa Saleh Batraki izay mamita iraka eto Madagasikara amin’izao fotoana izao.

Nandritra ny fihaonana dia nohazavaina ny Fifanarahan’i Samoa, izay rafitra fiaraha-miasa maneran-tany mampivondrona ny Vondrona Eoropeana sy ireo firenena mpikambana ao amin’ny OEACP. Notsindriana ireo soatoavina iorenan’izany, dia ny fanajana ny zon’olombelona, ny demokrasia, ny fitondrana tsara tantana, ny fiatrehana ny fiovan’ny toetr’andro sy ny fiarovana ny tontolo iainana, ary ny fampiroboroboana ny fandriam-pahalemana sy ny filaminana.

Nohamafisin’ny Sekretera Jeneralin’ny OEACP fa mbola mpikambana feno ao amin’ny OEACP i Madagasikara, ka afaka manohy misitraka ny tombontsoa ateraky ny fiaraha-miasa, indrindra ny fiaraha-miasa Atsimo–Atsimo (Coopération Sud-Sud) izay efa nivelatra nanomboka tamin’ny taona 2019.

Naneho fahavononana ihany koa ny OEACP hanohana an’i Madagasikara amin’ny alalan’ny fifanakalozana traikefa sy fifampizarana eo amin’ny dingan’ny Fanavaozana sy ny Fikaonandoham-pirenena.

Nohazavain-dRamatoa Minisitra tamin’ny fihaonan’izy ireo ny fizotry ny Fanavaozana eto Madagasikara, izay niainga tamin’ireo fitakiana nentin’ny tanora tamin’ny volana Septambra 2025 ka nitohy tamin’ny fifampidinihana notarihin’ny CAPSAT, ary miorina tanteraka amin’ny fiandrianam-pirenen’i Madagasikara sy ny safidin’ny Malagasy izay mitondra amin’ny Fanavaozana tena izy.

# MCR # Fanavaozana

# Fifanajana

# Fiarahamientana

# Fanolorantena