Nanokatra tamin’ny fomba ofisialy ny fanamarihana ny Andro Maneran-tany ho an’ny Fizahantany, tao Mahajanga, ny Praiminisitra, Lehiben’ny Governemanta ; fotoana izay nanamafisany fa manana ny harena sy ny tombony rehetra isika ahafahana manao ny fizahantany ho iray amin’ireo fanoitra lehibe amin’ny fampandrosoana ny firenena.

« Ampy hampandrosoana an’i Madagasikara ny fizahantany, raha jerena ny harena sy ny hakanton’ny zavaboary ananantsika. »

Notsindrian’ny Praiminisitra fa tsy sehatra mandeha irery ny fizahantany, fa mahakasika seha-pihariana maro ary afaka mampihetsika mivantana ny fitaterana, ny fotodrafitrasa, ny indostria, ny asa tanana, ny kolontsaina, ny angovo, ny tontolo iainana, ny varotra, ny fampiofanana ary ny famoronana asa.

Noho izany, hoy izy, dia ilaina ny fiaraha-mientan’ny sehatra rehetra, na ny Fanjakana, na ny sehatra tsy miankina, na ireo matihanina sy mpiara-miombon’antoka, mba hahafahana mampiasa amin’ny fomba feno ny hery ananan’ny fizahantany ho amin’ny fampandrosoana.

« Mila miara-mirona isika. Izay manana hery sy traikefa dia manampy ny hafa. Ny fifanampiana sy ny fiaraha-mientana no ahafahantsika mampandroso ity sehatra ity. »

Tonga nanotrona izao fotoana izao, niaraka tamin’ny Praiminisitra sy ny Minisitry ny Fizahantany sy ny Asa-tanana, ireo mpikambana maro ao amin’ny Governemanta, dia ny Minisitra misahana ny Fanavaozana, ny Minisitry ny Fampianarana Ambony sy ny Fikarohana ara-tsiansa, ny Minisitry ny Fampiroboroboana ny Indostria sy ny Fampivelarana ny sehatra tsy miankina, ny Minisitry ny Asa, ny Fampananan’asa ary ny Asam-panjakana, ny Minisitry ny Angovo sy ny Akoranafo, ary ny Minisitra delege miadidy ny Zandarimariam-pirenena. Ny fisian’izy ireo dia maneho indrindra ny maha-sehatra marolafy ny fizahantany sy ny filàna fampifandraisana ireo politikam-panjakana samihafa amin’ny fampiroboroboana azy.

NY NOMERIKA SY NY FAHARITAN-TSAINA ARTIFISIALY HO FANAVAOZANA NY FIZAHANTANY

Ny fanamarihana amin’ity taona ity dia mitondra ny lohahevitra « Agenda numérique et intelligence artificielle pour repenser le tourisme », izay mametraka ny nomerika sy ny faharanitan-tsaina artifisialy ho isan’ireo fitaovana vaovao afaka manova sy manatsara ny sehatry ny fizahantany.

Ho an’i Madagasikara, manana lanja manokana izany, satria ny teknolojia dia afaka manampy amin’ny fampahafantarana ireo toerana fizahantany mbola tsy ampy fantatra, fanatsarana ny fahitana an’i Madagasikara eo amin’ny sehatra iraisam-pirenena, fanamorana ny famandrihana sy ny fandraisana mpitsidika, ary fanomezana fahafahana bebe kokoa ho an’ireo mpandraharaha madinika sy ireo faritra mbola tsy voakasiky ny fizahantany betsaka.

Nohamafisina kosa fa na tsy azo ialana intsony aza ny teknolojia sy ny faharanitan-tsaina artifisialy, dia tsy afaka mahasolo ny fahaiza-manaon’ny Malagasy, ny kolontsaina, ny maha-izy antsika ary indrindra ny tsiky sy ny hafanam-po amin’ny fandraisana vahiny izany.

Mifamatotra amin’izany ny fanatsarana ireo lalana sy fotodrafitrasa mankany amin’ireo toerana fizahantany, ny fanitarana ny fifandraisana sy ny sidina, ary indrindra ny fampiofanana ireo mpisehatra rehetra mba hahafahan’izy ireo mampifanaraka ny tolotra amin’ny fenitra sy ny fiovana entin’ny teknolojia.

Notsiahivin’ny Praiminisitra ihany koa fa tsy ireo vahiny avy any ivelany ihany no atao hoe mpizaha tany. Fizahantany ihany koa ny Malagasy mifampitsidika, mamantatra ireo faritra sy kolontsaina samihafa ary mankafy ny harena misy eto amin’ny taniny. Antony iray tokony hanamafisana ny fizahantany anatiny izany.

Ny tanjona dia ny hahatonga ny fizahantany ho sehatra tena mamorona asa sy harena, mampandroso ny faritra, manome lanja ny kolontsaina sy ny asa-tanana ary miaro sy mampahafantatra ny harena voajanahary mampiavaka an’i Madagasikara.

Fiaraha-mientana, fampivoarana ny fahaiza-manao ary fanavaozana no antoka hahafahana manova ny harena ara-pizahantany ananan’i Madagasikara ho tena hery mitondra fampandrosoana.

𝐍𝐲 𝐬𝐞𝐫𝐚𝐬𝐞𝐫𝐚